الأحد، فبراير 27

أحمد شفيق في 48 ساعة



خلونا نتكلم بلهجتنا المصرية عشان نرتاح ونريح

ناس كتير بتسأل انتو ليه مش عايزين أحمد شفيق رئيس الوزرا الحالي اللي مبارك سابهولنا قبل ما يخلع ؟؟ وبنرد ونجاوب نقول ان أحمد شفيق هو امتداد لنظام مبارك وأن احنا هدفنا من التغيير تغيير نظام مبارك الفاسد كله مش مجرد تغيير شخص الرئيس فقط

لكن ناس كتير مش بتقتنع بالكلام ده وبتقولنا اننا بنبالغ وان الراجل شكله راجل كويس – مش عارف من امتى وبقت المناصب بالشكل – واننا لسة مشوفناش منه حاجة وحشة ، بالرغم من انه أساساً زي قلته ولا منه أي فايدة حالياً ..

ببساطة خلونا نستعرض أحداث 48 ساعة فقط في عهد حكومة أحمد شفيق بعد التعديل الوزاري اللي اتعمل وهناخدها بالنقط عشان الناس متتوهش مننا ولا تتلخبط ..

1- كانت الناس يوم الجمعة اللي فاتت – الموافق 25 فبراير – بتتفرج على إعادة حلقة برنامج " واحد من الناس " اللي بيقدمه الإعلامي عمرو الليثي واللي كان مستضيف فيها المخرج خالد يوسف و رئيس تحرير جريدة الدستور السابق الأستاذ إبراهيم عيسى ، وفي الحلقة دي – واللي كان بثها المباشر يوم الخميس 24 فبراير – اتكلموا عن ثورة 25 يناير و قالوا رأيهم بكل صراحة وانتقدوا أحمد شفيق رئيس الوزرا اللي سابهولنا مبارك بعد ما مسمره بنفسه في الكرسي كما انتقدوا عمرو موسى والدعوات اللي بتنادي ان عمرو موسى يبقى رئيس . ، كان البث المباشر للحلقة زي ما قولنا يوم الخميس 24 فبراير وكلنا عارفين ان الحلقات اللي فيها بث مباشر بيبقى صعب توقع اللي هايتقال فيها يعني بتبقى عاملة زي البطيخة يا تطلع حمرة يا تطلع قرعة ، وعلى حظ رئيس وزراء مبارك – أحمد شفيق – مطلعتش حمرة للأسف وطلعت قرعة مع ان المفروض كانت تطلع حمرة عشان تبقى معبرة اكتر ، انتهت الحلقة وخلصت وكان المفروض الحلقة تتعاد بالكامل تاني يوم – الجمعة 25 فبراير – لكن فوجئ المشاهدين بقطع الحلقة بعد 45 دقيقة من بدايتها وتحديداً قبل فقرة إبراهيم عيسى وخالد يوسف ، ونكتشف في النهاية بعد شوية ان أحمد بيه شفيق رئيس الوزرا اللي سابهولنا مبارك الله يحرقه مطرح ماهو قاعد هو اللي اتصل بإدارة قناة دريم وطلب قطع بث الإعادة عشان طلعت قرعة مطلعتش حمرة زي ما كان عايز .

خلاصة الموقف ده ان أحمد شفيق اللي المفروض انه بيمثل حكومة انتقالية لثورة راجل ديكتاتور زيه زي مبارك وبيعمل نفس اللي كان بيعمله نظام مبارك بالظبط وبيصادر على أراء الناس ، وانا من موقعي هذا بقوله متزعلش ياريس وان بقولك حمرة مش قرعة واعى تزعل نفسك

وادي حلقة واحد من الناس للي يحب يشوفها اضغط هنا لمشاهدة الحلقة كاملة

2- ظهر فيديو اليومين اللي فاتو بيظهر فيه مدير أمن البحيرة وطالع يسب ويلعن لأم الشعب اللي قارفهم في عيشتهم ده ، وطالع يقول انهم – الداخلية يعني – أسيادنا وأن أي عرص – ولامؤخذة في اللفظ لكنه اتقال كدة - هايتكلم هايتقطع ايده وهايُعتقل ، وبينفي محاسبة أو بدأ محاكمة أي مسئول في الداخلية ، بالإضافة إلى أهم تصريح قاله في الفيديو وهو تحريضه لمواطن على قذف المتظاهرين بالحجارة وده كان عن طريق إعطائه مبلغ من المال – رشوة يعني – من جيبه الخاص – وده على لسانه – لما كان عند البنك ولقى الراجل ده مش عارف يصرف فلوس من البنك فقام الراجل الخير ابن الخير اللي هو مدير امن البحيرة بإعطاء الراجل الفلوس دي من جيبه عشان يضرب المتظاهرين بالطوب بدل ما يضرب في الداخلية ، ونبي قلبه كبير الجدع ده ..

فيديو مدير أمن دمنهور وتصريحاته القذرة


3- الخلاصة : هي ان ممارسات الداخلية القمعية وأساليبهم الواطية مازالت مستمرة وأحب افكركوا ان محمود وجدي برضه خازوق من خوازيق مبارك اللي سابهالنا مع أحمد شفيق ، وقيل ان مدير أمن البحيرة اتعزل لكن سرعان ما تم نفي الخبر واتضح انه اتنقل بس زي ما تم الإعلان على صفحة الداخلية على الفيس بوك وادي الصورة زي ما انتو شايفين بتأكد النقل ، يعني مش فاهم ازاي ينقله بس إلا إذا كان زيه وأخلاقه زيه بالظبط !!

صورة الصفحة الرسمية لوزارة الداخلية اضغط على الصورة للتكبير

وده لينك تغطية صحفية لحلقة محمود وجدي مع المذيع خيري رمضان على برنامج مصر انهاردة اللي اتذاع على القناة الثانية يوم الأربع 23 فبراير اضغط هنا للوصول وده حوار مهم وكافي لإسقاطه بل كافي لسجنه .

4- تأكيداً لما جاء في الجزء السابق الخاص بالداخلية نسرد إليكم وقائع ما حدث في المنصورة مساء الجمعة - 25 فبراير – في اليوم ده كان المفروض ان كان عنوانه جمعة التطهير وكان عبارة عن مظاهرات في معظم او كافة محافظات مصر لإسقاط أحمد شفيق وقانون الطوارئ والإفراج عن المعتقلين السياسيين بالإضافة لعدة مطالب تانية ، المهم فوجئ الناس يومها باليل بظهور الأمن المركزي بنفس غشوميته وغباؤه واخترعوا حكاية ان فيه ناس حدفت طوب على مديرية الأمن – على أساس انهم مش تبعهم يعني – وتعامل الأمن المركزي مع المتظاهرين هناك بالرصاص المطاطي وقنابل الغاز ، وطبعاً وقعت اصابات بالإضافة إلى اعتقال عدد من الشباب ، لحد ما تدخل الجيش وانحسب الأمن المركزي وتمت السيطرة على الوضع والوضع هدي ..

خلاصة الموقف ده ان محمود وجدي نسخة طبق الأصل من حبيب العادلي بكل تصرفاته القمعية والغبية وان مازالت الداخلية هي الداخلية بكل ما فيها من وزير لغفير ..

5- نرجع لأحمد شفيق تاني ، يوم السبت تقريباً كان المفروض يطلع الإعلامي محمود سعد يقدم حلقة من حلقات برنامج مصر النهاردة على التلفزيون المصري لكن فوجئ الجميع انه اللي بيتذاع يومها حلقة مسجلة وقديمة ولم يتم بث الحلقة الحية كما كان مفترض ، شوية وقت صغيرين وظهرت الحقيقة وهي كالآتي :

كان أحمد شفيق رئيس الوزراء اللي مسممره مبارك في مكانه ولازقه بنفس نوع الغراء اللي كان بيستخدمه مبارك ، جاله الكيف انه يطلع في برنامج مصر انهاردة مع محمود سعد عشان يدلدأ كلمتين من بؤه يقرفنا بيهم ويفضل يقول هاعمل وهاعمل وهاعمل وشوية كلام فارغ زي كل مؤتمر صحفي بيعمله أي واحد من ممثلين مبارك وكان الله بالسر عليم ضاع مننا شوية وقت والناس جالها صداع وبطنها قلبت وخلاص ، ودرءاً للمفاسد اللي هاتترتب على اللقاء ده كان وجهة نظر الأستاذ محمود سعد انه يرفض اللقاء ده وكما وضح بنفسه ان السبب وراء رفضه انه يستضيف شفيق بأن الأستاذ محمود سعد رافض شفيق كرئيس وزراء وانه منحاز لمطالب الثوار الرافضين لحكومة شفيق ، وطبعاً كان رد الفعل الغبي واللي بيدل ان شفيق هو امتداد لحسني مبارك وجزء من نظامه انه أصدر أوامر بالتضييق على محمود سعد عشان يبقى مجبر انه ينهي تعاقده مع البرنامج وبالفعل هذا ما قد حدث وتم انهاء تعاقد محمود سعد مع البرنامج وطلع أحمد شفيق يبرر ان محمود سعد أنهى تعاقده مع البرنامج نظراً لتخفيض مرتبه من 8 ملايين جنيه في السنة إلى مليون ونصف في السنة لكن طبعاً اللي بيبين مدى كدب شفيق ومدى سوء النية اللي ورا اللي حصل ده هو اللي حصل في برنامج واحد من الناس ..

ومن هذا كله نوصل لحقيقة مؤكدة واحدة هي ان أحمد شفيق راجل مبارك وولاؤه لمبارك بصفته أحمد تلاميذ مبارك كما قال سابقاً ، وان استمرار أحمد شفيق على رأس الحكومة يعني إستمرار نظام مبارك ، وان لحد الآن مفيش حاجة اتغيرت غير ان مبارك تم ابعاده من منصبه فقط بينما مازال نظامه مستمر متمثل في حكومة أحمد شفيق ..

ملحوظات :

بعض الناس بتقول ان أحمد شفيق كان وزير طيران ناجح وان في عهده قطاع الطيران اتقدم ، والرد بكل بساطة هو ان فيه تقرير لمجلة " بيزنيس انسايدر " ودي مجلة امريكية متخصصة في المجالات الإقتصادية وبتقول ان شركة مصر للطيران وهي الشركة الأم لقطاع الطيران في مصر تصنف في المرتبة التاسعة من بين أسوأ شركات الطيران على مستوى العالم .. لقراءة خبر وزارة الطيران اضغط هنا

وزير البترول الحالي محمود لطيف هو أحد أعضاء مجلس الإدارة في الشركة التي تصدر الغاز للكيان الصهيوني ، يعني ان مفيش حاجة اتغيرت اتشال وزير بترول موالي لإسرائيل وجيبنا واحد تاني بداله موالي لإسرائيل يعني مفيش تغيير تم

لقراءة خبر وزير البترول اضغط هنا

وأخيراً أترككم مع هذا الرجل المصري الذي يتحدث بوعي أكثر من كثيرين من النخبة السياسية والمثقفة


ليست هناك تعليقات:

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com