الجمعة، ديسمبر 4

في زفتى الحنفية بتنزل تمرهندي وعرق سوس

قبل كدة كانت الحنفيات عندنا في مركز زفتى التابع لمحافظة الغربية كانت بتنزل بترول مخفف مابين قوسين ( مية بجاز ) ، انهاردة بقى هف على بالي اخد دش مية سخنة حماية الجمعة بقى عقبال اللي مستحموش ، وكالمعتاد لما واحد يقول هاستحمى فأول حاجة بتيجي في بال البني آدم مننا هي الحمام والدش أو الطشت للي بيحي يبلبط لكن البانيو رجس من عمل الشيطان ، الأسقف بتاعتنا متتحملوش ..
المهم بعد تفكير طويل ومرير اخدت مني عدة ساعات اتخذت قرار بإني اتوكل على الله وادخل آخد الدش المعتبر ، لكن للأسف وكأن ربنا مش رايد اني أنضف لقيت المية مقطوعة :’(
على فكرة : انا عارف اني رغاي لكن هاتسمعوا حكايتي ومآساتي يعني هاتسمعوها بس كدة
المهم يا سيدي ويا ستي رضيت بالأمر الواقع وقولت استنى شوية لحد ما المية تيجي تاني ، وبالمرة قولت ياد مادام معدي على التليفون اتصل بالشبكة اسألهم المية مقطوعة ليه واهه الواحد يضيع وقت ..
اتصلت بالراجل رد عليا بكل احترام وواضح انه موظف غلبان وطيب جداً كان بيكلمني بكل احترام وخد رقمي وقالي هاكلمك واتابع معاك
شوية واتصل بيا سألني المية جت ولا لأ ووانا بكلمه سمعت صوتها شرفت الست هانم وصوتها عِلي وهي بتملا الجردل ... دي المية شكرته وقعدنا نحترم في بعض ساعة في التيفون اقوله شكراً وهو يقولي تحت امرك ويقولي الف سلامة واقوله الله يسلمك يا سيدي الله يكرمك وهكذا لحد ما الحمد لله قفلنا .
دخلت الحمام على أساس اني اقفل المية وهنا بقى كانت الصدمة ..
لقيت يا حضرات المية اللي نازلة من الحنفية عبارة عن تمر هندي او عرق سوس طبعاً ده تبيه لوني فقط لكن الطعم والريحة الله اعلم هي ايه
بس المرة دي مش جاز ..
اسيبكم بقى مع الصور وبعتذر عن رداءة الصور لأن الموبايل غلبان شوية او شويتين تلاتة
وعلى فكرة المية كتير بتيجي بالصورة دي من غير حتى ما تكون مقطوعة !!












ليست هناك تعليقات:

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com