الجمعة، أكتوبر 16

البنطلون الساقط




من المناظر السيئة جداً اللي بتخليني أشعر بالعار ، هو منظر بعض الشباب اللي لابسين البنطلون الساقط ، وبصراحة انا مبحبش اسميه غير بهذا الإسم ، لأنه فعلاً بنطلون ساقط ومنتهى السقوط كمان ..

انا بصراحة مش عارف ازاي يبقى راجل يقبل على نفسه انه يظهر بمنظر ساقط بالطريقة دي ، وبحس بالعار لما بلاقي واحد بالمنظر ده ، بحس انه راجل مغشوش ، أو بمعنى أوضح راجل ....... مش مظبوط

المهم

اللي خلاني اكتب عن الموضوع ده مش موضوع البنطلون الساقط اللي بقى موضة ، والصراحة هو وكسة مش موضة ، اللي خلاني اكتب هو منظر لاحظته اكتر من مرة أثناء الصلاة في الجامع وتحديداً صلاة الجمعة لأن بيبقى فيها زحمة وناس كتير ..

كام مرة يصادف قدامي في الصلاة الاقي شاب لابس بنطلون من النوعية الساقطة ، ولابس تيشيرت قصير جداً تحس انه بتاع ابن اخته الصغير وطول ماهو قاعد في الخطبة عمال يشد ف التيشيرت ينزله لتحت ويرفع في البنطلون لفوق !!! سبحان الله

طيب ما تريح نفسك يابني والبس حاجة محترمة بدل ما تقعد تعذب في نفسك كدة ويبقى منظرك مش حلو

يا سيدي متفتكرش ان محدش واخد باله .. تبقى غلطان .. كل الناس بتبقى واخدة بالها ومستاءة كمان من المنظر ده

عايز تلبس اللبس ده ألبسه زي ما تحب في حياتك العادية – بالرغم من اعتراضي عليه – وكل واحد حر

لكن انك تيجي تصلي بيه اعتقد ده مش كويس ابداً ، ولا منظر يليق بمسلم واقف بين ايدين ربنا وهو بيصلي

ولا يليق بقدسية الصلاة ، ولا يليق بقدسية المسجد ، ولا يليق حتى بالرجال ان يكونوا كدة !!

نفسي زي ما بنحترم الإنترفيو بتاع اي وظيفة او شغلانة جيدة بنروحها ونلبسلها احسن ما عندنا نحترم الصلاة ونلبسلها لبس محترم يليق بالمسلم ويليق بقدسية الدين والصلاة ، لأن بصراحة كدة عيب اوي علينا اننا نظهر بالمنظر الساقط ده

ليست هناك تعليقات:

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com