الخميس، يوليو 9

لا نووى ولا بايولوجي .. احنا بتوع الموبايولوجي

لا نووى ولا بايولوجي .. احنا بتوع الموبايولوجي


لا تقولي نووي ولا دبابات ولا بايولوجي احنا هانحارب بالرنات أو بإختصار السلاح الموبايولوجي ، طبعاً ده مش مجرد عنوان للتدوينة ، ده يبقى شعار المرحلة القادمة ان شاء الله واللي بدأت من أواخر 2008 ..

انتهى بقى عصر الحرب بالدبابات والرشاشات والمدرعات ، وكمان مش هانسمع بعد كدة عن سباق التسلح النووي او البايولوجي خلاااص كل ده هايبقى موضة قديمة لأننا دلوقتي داخلين على حرب الرنات ..

أيوة الرنات ، هانحارب بالرنات ، هانتصل على اسرائيل واول ما يفتحوا علينا هووووووب يقوموا لابسين في الحيطة ويجيلهم امراض وفي خلال سنتين نموتهم كلهم ونمحيهم ، ونرجع المسجد الأقصى ويرجع الفلسطينيين لأاراضيهم المسلوبة من سنة 48 ونبقى اقوى دول العالم .. كل ده برنة واحدة بس ترن بيها على العدو..

ولمن لا يعلم السلاح العظيم ده بس في مصر مش في اي حتة تاني في العالم مش في امريكا ولا في ايران ولا في اسرائيل ولا في اي دولة نهائي غير مصر ، أيوة مصر متستغربوش مصر ام الدنيا يعني ام امريكا وام اسرائيل وام اللي يتشددلهم كمان ..

السلاح ده نتملك منه في مصر نوعين ..

النوع الاول وده نقدر نستخدمه في اي مكان نكون فيه ونفدر نسميه الموبايولوجي وهو عبارة عن خط اتصالات بس خلي بالك مش 011 لألأ لازم يكون 014 عشان يشتغل ويكون فعال طبعاً بتسأل ازاي وليه ؟ هاقولك بس لما اوضح النوع التاني

النوع التاني بقى من السلاح الخطير ده وهو متعلق بالتقسمة الجغرافية لمصر يعني بنستخدمه من مكان واحد بس مينفعش نستخدمه من اي مكان زي النوع الأول بس ممكن بإستخدام اللاسلكي نتنقل بيه في منطقة محدودة ( على حسب مدى تغطية اللاسلكي ) ، طبعاً الكل بيسأل فين المكان الخطير ده ؟ ، وانا مش هاتعبكم المكان يبقى مدينة العاشر من رمضان ، اللي فيها النساجون الشرقيون بعدين حد يفتكرها حتة تانية ..

شوفتو بقى ان مصر تملك السلاح اللي يقدر تخليها تسود العالم كله برنة واحدة او برسالة على الموبايل ...

**********

طبعاً اوعى حد يصدق الكلام ده لا يبقى عبيط والعيال تحدفه بالطوب في الشارع

بإختصار بقى انا حطيت صوابعي العشرة في الشق من اللي بشوفه وبسمعه كل يوم

ديماً لما نلاقي نفسنا فاضيين ندور على اشتغالة نشتغل بيها نفسنا !! ، طيب لييه ؟؟ ما نخلينا محترمين ومؤدبين احسن .

الملخص والمختصر المفيد من فترة ( تحديداً اول ما شركة اتصالات ) نزلت ارقامها الجديدة اللي بتبدأ برقم 014 انتشرت اشاعة بين المصريين مفادها ان الأرقام دي ارقام بترن على الناس من اسرائيل واللي هايفتح عليهم هايجيله سرطان ويعيا ويموت في الحال !!!!!

طيب انا راضي ذمتكم بقى الجيش الإسرائيلي هايسيب الدبابات والطايرات ويسيب الغارات والمستوطنات ويقعد يرن علينا ؟؟ اما جيش فاضي صحيح

الإشاعة التانية بقى ان بيقولو برضه بنفس الإسطوانة ان محدش يرد على اي رقم فيه 5 ارقام شبه بعض لأن دي ارقام برضه من اسرائيل والل هايفتح ويرد هايجيله سرطان وانفجار في المخ !!!!! ، طبعاً لا تعليق

واحد صاحبي رقمه مميز فيه 66666 كان بيشتكيلي ان الناس مبتردش عليه وطبعاً كان بفضل الإشاعة المحترمة دي وعشان الناس ترد عليه اضطر يبعت رسالة لكل واحد هايلكلمه قبل ما يتصل عشان يرد ..

الإشاعة الأخيرة وهي الكوميدية اكتر من الاولانيين وهي عبارة عن رسالة بيتم تداولها الآن على النت وهي نصها كالآتي : بالامس من برنامج البيت بيتك تم اذاعة تحذير هام لكل مواطن بعدم الرد على اي رقم متصل يبدأ برقم 015 لأنه عند الرد عليه يرسل موجات سرطانية عبر المحمول و يتسبب في امراض كثيرة و طبعا مفيش حد هيرد عليك ,,, ياجماعة عدد المصابين في ازدياد ,, ياريت كله يبلغ اللي يعرفه ,, الموضوع ده مهم جدا: اوعي يلعب الشيطان في راسك وتقرأها وتقفلها وتقول انا مش فاضي ارسلها يقول: تخيل انك واقف يوم القيامة وتحاسب ولست ضامن ..

طبعاً انا بشوف الرسالة دي بقالي اكتر من شهرين وكل يوم الاقي بدايتها بكلمة بالأمس اظاهر الزمن واقف وانا مش واخد بالي !!

طبعاً كتير مننا ميعرفش ايه 015 ده ولا فين ببساطة وبدون رغي ولا لف ولا دوران ده مفتاح العاشر من رمضان ، ولله مفتاح العاشر من رمضان زي 02 ماهي مفتاح القاهرة وزي 03 ماهي مفتاح اسكندرية وزي 040 ماهي مفتاح الغربية

افرض بقى كنت شغال في شركة هناك واتصلو بيك من الرقم الأرضي على موبايلك اكيد هايظهر طبعاً رقم 015 في الاول هاتعمل ايه ؟

ادي صورة من موقع المصرية للإتصالات بيوضح ان 015 هي مفتاح العاشر


وارجوكم ارجوكم بطلو تشتغلو نفسكم بقى وتشتغلونا معاكم

هناك 3 تعليقات:

  1. انا عاوز اتطوع في جيشكم ده

    مواصفاتي
    جندى مخلص وبنام بالنهار وبصحي بالليل علشان المراقبة يعني
    وسلاحي نوكيا 012 موبنيل أر تي يور

    ومستعد او منضم لطلائع الكتيبة ارن طول الوقت علي الاعداء


    اما افضل مميزاتي كجندى انني من الصم لذلك مش هستقبل قذائف اقصد رنات الاعداء لذلك سوف اكون من اللذين يظلون علي قيد الحياة بعد انتهاء الحرب



    اتمني قبولي بسلاحي في خدمتكم

    الموقر بما فيه
    الجندى المصري
    سلاح 012 موبنييل

    ردحذف
  2. هههههههههههه

    الواحد بيستغرب فين عقول الناس ؟
    عدم التفكير و اراحة العقول
    و الانسياق الأعمي خلف الاشاعات
    بدون تحري الصدق هيودينا ف داهية
    اكتر من اللي احنا فيها

    ردحذف