الثلاثاء، مايو 27

كنا خايفين عالسلم ؟ اهه خد النقابة وادانا السلالم كلها

تحديث هام

الآن حزنت جداً لما عرفت ان الست العجوزة دي صاحبة تاريخ نضالي ووطني كبير ومشرف
وحزنت اكثر ان تطلع منها كلمة زي اللي قالتها لأختنا الكبيرة
على العموم انا اقدم اعتذاري لتاريخها الوطني المشرف والله يسامحنا ويسامحها بقى


كنا خايفين عالسلم ؟ اهه خد النقابة وادانا السلالم كلها

ايام انتخابات نقابة الصحفيين الكل كان قاعد مرعوب خايف لجناب عظمة نقيب الصحفيين مكرم محمد احمد يمنع الوقفات الإحتجاجية من على سلالم نقابة الصحفيين ،

وناس كتير كانت بتنام يجيلها كوابيس بليل ان سيدنا النقيب مكرم خير الله اجعله خير كدة كان فيه وقفة وقام طالع بالخرزانة ومزعق للي واقفين في المظاهرة ودور فيهم الضرب وقالهم امشي ياد انت وهو من هنا ..

ويحلم آخر ان عظمة النقيب مكرم خير اللهم اجعله خير جاب 4 عمال طوال عراض ( من الفواعلية ) وقالهم عايزكوا تسووا السلم ده بالأرض ، ويقوم العمال يبدأو في التكسير وهوب يطلع واحد ماسك بانر مكتوب عليه كفاية ويقف وهو رافع البانر – اللي مكتوب عليه كفاية – يتفرج على الناس اللي بيهدو السلم ودموعه تجري على خدوده

اما من جانب الكُتاب فكتير منهم كتبوا مقالات طويلة عريضة نددوا فيها بما كان يدور ببال سيادة النقيب مكرم انه كان عايز يمنع وقفات السلم ( واعتقد ان سبب اطلاق وقفة سلمية هو لأن كل الوقفات على السلم ) ، وكتير من الصحف فردت مساحات كبيرة من أجل قضية السلم ، وقامت حركات احتجاجية وجابت كل ربوع مصر مظاهرات ملأت الشوارع ترفع شعار نعم للسلم .. لا لمنع الرقص – اقصد الوقفات – على السلم

وفجأنا النقيب الملهم سيدنا مكرم محمد احمد بأنه لم يمنع وقفات السلم لكنه حطلها شروط عشان يضمن جودة الوقفة وفاعليتها !!!!

لكن عظمة النقيب كان أذكى من الجميع – بما فيهم انا لأسف – وخد النقابة كلها ازاي بقى ده اللي هاتعرفوه في الشرح الآتي :-

الأول كنا خايفين ان النقيب أو الملازم أو اللوا مكرم ياخد السلم ويمنع الوقفات من على السلم ، وبما اننا أثبتنا للعالم كله اننا أصحاب حضار الـ7000 سنة ومش بنعرف نقف غير على السلم ، ولن نقبل بغير السلالم بديل ( مش عارف عشان معظم الرجالة زوجاتهم بتنيمهم على السلم ولا ايه ؟؟ ) ، الى جانب طبعاً اننا بندعو الى وقفات في ميدان التحرير وامام مجلس الشعب وفي النهاية بترسى على السلم ( اه نسيت افكركو ده سلم نقابة الصحفييين لا تفتكروه سلم وزارة الداخلية من لفظ نقيب ولا حاجة ) ،

المهم طبعاً سيادة النقيب ميخلصهوش ان الحركة الوطنية تقف وتتعطل عشان خاطر كام درجة سلم ،، في ستين داهية السلالم كلها لكن الحركة الوطنية متقفش وتتعطل ,, - ادي الوطنية زقة يابني وحركها – لذلك قام النقيب القائد الملهم مكرم محمد احمد بالسماح والعفو عن سلم النقابة الخارجي للوطنيين والحركة الوطنية – اللي كانت هايتقطع عيشها في حال منعه لوقفات السلم - ، وكمان ماكتفاش بكدة

لألأ

ده النقيب مكرم كله كرم وأمر النقيب الأمير حراسه بأن يعطوا السلالم الداخلية ايضاً للصحفيين الغير نقابيين !!

اه ولله ده بجد مش تريقة

سيدنا النقيب أمر بأن تكون له هو والنقابيين النقابة – واعتقد مش كل النقابيين – ولنا احنا الصحفيين الشباب والغير نقابيين بأن تكون لنا جميع السلالم

النقيب الملهم أمر حراسه بمنع اي حد غير نقابي من استخدام الأسانسير !! ، ده في حالة دخولك النقابة أصلاً لأن الآن وبعد أوامر النقيب الملهم أصبح من الصعب ان تدخل النقابة إلا بعد خضوعك لتحقيق طويل عريض من قبل حرس النقابة ويقولولك انت رايح فين يا استاذ ؟ وكأنك دخلت الجامع وانت لابس الجزمة !!! ، ومش كدة وبس لو جاوبت على اسئلتهم وطلعت محظوظ ودخلت النقابة مش هايسمحولك بالتحرك الا بعد التأكد ان فيه شخص بيستناك فعلاً وانت طالعله – اوعى تكدب لايمدوك على رجليك - ، طلعت محظوظ بقى ولقيت حد فعلاً وحظك طلع وحش ومطلعش مستنيك في الدور الأرضي وطلع مستنيك في الرابع ولا التامن هايبقى يومك اخبر ومش فايت يا أمور

ممنوع استخدام الأسانسير لغير النقابيين يا استاذ !!

ولله ما انا اللي بقول متبصوليش كدة

دول حرس النقابة يا محترمين هو اللي بيقول كدة على حسب أوامر سيادة النقيب مكرم

يعني هاتطلع السلم هاتطلع السلم

ولو حصل ولقيت حد نقابي يتبناك وياخدك تحت جناحه وتطلع معاه ياويله يا سواد ليله

هايتقال عليكو كلام مش كويس - ....- وتطلع واحدة في ربيع عمرها المشرق – يعني في نهاية ال80 سنة كدة – تزعق وتقولكو – وع وع وا وا – ده الزعيق على فكرة ، وتقوم قايلالك احنا مش قوادين وفي لحظة تطلع انت والنقابي اللي هاتطلع معاه بينكو علاقة غير شرعية وربنا يستر اعراضنا واعراضكو بقى ( والموقف ده بالظبط حصل مع واحد صديق ومع اخت كبيرة لنا كلنا نقابية لما كان زميلنا الغير نقابي ده طالع ومنعه الحرس واتصل بأختنا الكبيرة – انا مصر على الكبيرة لأنها أكبر منه بكتير فعلاً واخت حقيقية كبيرة لنا – ونزلت اختنا الكبيرة اللي لا أحد يختلف على احترامها عشان تطلع الزميل الغير نقابي لتفاجأ بالست العجوزة تقولها لأ وتقولها الكملتين اللي انا قولتهم دول ) يعني مبألفش ده امبارح اهه

يبقى بالذمة هو مش ادانا السلالم وخد النقابة ؟؟ ومش السلالم بس اللي خدناها ده احنا خدنا معاها حاجة تانية كمان خلوها في سركوا بقى

هناك 4 تعليقات:

  1. صبرا ال كفايه فان موعدكم الجنه...
    هى السلالم يس هى اللى اتاخدت مننا والا النقابه....دى مصر كلها متاخده

    ردحذف
  2. اخى الفاضل

    اختى الفاضلة

    عضو اتحاد المدونين المصريين

    انصحك بالتواصل مع موضوع لحمايتك مما

    قد يوقعك تحت طائلة القانون ونحن نعمل

    لمصلحتك وحمايتك ..

    فى انتظارك بمدونة الاتحاد ولك كل الشكر

    نعمل من اجلك ولوجه الله
    -----
    اين شعار الاتحاد ؟

    ردحذف
  3. اخى الفاضل
    اختى الفاضلة
    عضو اتحاد المدونين المصريين
    ادعوكم للاطلاع على موضوع من ابداعات الاعضاء
    --------------------
    **************( اتيكيت استخدام الايميل ) ***************
    من مدونة المصرى الاول ....... للزميل العزيز عضو الاتحاد

    -------------------------( وائل المصرى ) ----------------------------
    اتمنى ان تسعدوا بزيارتكم

    ورجاء ان ترشحوا لنا اى موضوع يفيد باقى الاعضاء لنشره فى مدونة من ابداعات الاعضاء
    ----------------

    ردحذف
  4. يعني طلبتوا السلالم اللي برا
    سابلكم جوة وبرة

    مش تحمدوا ربنا
    وبعدين هتدخلوا تعملوا ايه جوه؟
    ماحدش كان قالكم تدخلوا اصلا

    حسبنا الله وكفي
    بصراحة من يوم ما بقثي نقيب الصحفيين و انا مش مرتاحاله
    كنت حاسة انها مش هتعدي علي خير

    صبرا
    بكرة يغور كل ظالم
    ونرتاااااااااااااااااح
    قول يارب

    ردحذف