الاثنين، أكتوبر 15

اعتقلوا عبد الرحمن لما قلبها عليهم ومحدش سأل فيه ولا سأل عنه

صحيت مفزوع على رسالة تويتر تفيد بإعتقال أحد المدونين واسمه عبد الرحمن فارس مدون صاحب مدونة لساني هو القلم ودخلت على الإنترنت من أجل التاكد والمتابعة ولقيت فعلاً انه معتقل بعد صلاة العيد مباشرة وطبعاً التهمة جاهزة ومعروفة توزيع منشورات هدفها التحريض على قلب نظام الحكم ( اللهم اجعلني من المحرضين ) والحض على كراهية النظام ( اللهم زدها في قلبي وانقلها الى قلب كل كائن حي ) وقلب نظام الحكم ( ان شاء الله قريب وقبل موتك يا مبارك ) ده على اساس ان النظام معدول وعدل وعال العال

نيجي بقى للمهم

عبد الرحمن معتُقلش ( بضم الشين ) بسبب توزيعه منشوراتاللي هي التهمة الخايبة الفاشلة بتاع الحكومة الفاشلة الخايبة انما اعتقلوه بسبب تدوينة كتبها في اول اكتوبر عنونها هنقلبها عليهم وهنراقب أمن الدوله زي ما بيراقبونا وهو ناشر فيها أسامي لبتوع أمن الدولة في الفيوم وزي ماهو باين من العنوان انه بيدعوا لمراقبتهم زي ما هما بيراقبونا وبصراحة معاه حق هما لا أنبيا ولا رسل ولى حتى اوليا من اولياء الله اللي عمري ما عرفت تاريخ ولي منهم

ونبي ما تستغرب اوي كدة من الموضوع الراجل مغلطش في الذات الإلهية ولا غلط في احد الأنبيا ولا دعى لنبش قبور أحد الأنبيا ولا قال تعالو نطلع القمر بالجمل ؛ رغم ان الفكرة جريئة وغريبة والأولى من نوعها لكنها مش مستحيلة ولا عيب ولا حرام دول بشر وأقل درجة من درجات البشر دول بيحمو اكبر نظام فاسد يعني ياريتهم بيحموا حد عدل

نيجي لنقطة تانية بتوجع شوية

عبد الرحمن انا مشفتش حد عمل معاه زي ما بيعملوا مع اي مدون معروف يُعتقل ولا حاجة يعني لا شفت حد تضامن ( وعلى فكرة التضامن بيبقى بالكلمة محدش مطلوب منه ياخد جركن جاز ويروح يولع في اللي خدوه ) ولا شفنا حد قال يا جماعة من المدونين الإخوان غير مجموعة لا تتعدى اصابع اليد الواحدة هي اللي تولت نشر الخبر والتضامن وكمان ايه تخيلو معظمهم مش اخوان يعني مشفتش تضامن من مدونين الإخوان او المدونين اللي مش اخوان تضامن معاه ولو بالكلمة

ممكن بقى افهم ليه ؟

هل لأنه مش مشهور ؟ ولا لأنه نشر فكرة غريبة وجريئة مش معتاد اننا نشوف زيها ؟ ولا لنه على عرب ورد بريس ومش بلوجر او مكتوب ؟ ولا ايه يعني ؟ ما انا عايز افهم

ان كان مش مشهور فهل ده ذنب ووصمة عار علشان محدش يعبره ولا حد يسأل عنه ؟

ولا علشان الفكرة اللي نشرها ؟ ان كان بسببها فيبقى خلاص مدام خوفكم من البتوع اللي بيحموا اكبر بتاع فاسد في مصر ( مبارك يعني ) يبقى الأولى انكم تكفروا بالله وتعبدو البتاع وتعملو اصنام على هيئة مخبرين وتسجدلهم لأنكم خايفين من شوية حاجات المفروض انهم بشر زيكم بل اقل لأنهم يحمو ظالم وفاسد

المصيبة انها تكون الطائفية الإلكترونية انه على عرب ورد بريس مش بلوجر او مكتوب ( وولله مفي حاجة بعيدة اليومين دول ) 0

كلمة واحدة هاقولها لكل من لم يتضامن مع عبد الرحمن من الإخوان او مش من الإخوان اللي عرفو بالخبر ولم يشغلو بالهم

خلو عندكم دم وخليكو محترمين وخليكو بني ادمين ومتبقوش جبنا

وعلى فكرة انا بكتب التدوينة فجر تالت يوم العيد وهو ممسوك بعد صلاة العيد صباح الخير بقى


هناك 4 تعليقات:

  1. اتضامن مع عبد الرحمن و أرجو من الله خلاصه من ايدي المستبد و رجاله و احترم حقه في التعبير

    ردحذف
  2. استاذ محمود

    اوجعتني كلماتك

    واستشعرت بالخجل

    لانني علمت الخبر منذ يومها ولم افعل شيء

    لم يخطيء عبد الرحمن

    ولم تكن فكرته غريبة

    ولاكلماته بلامعني

    ولكن الغريب حقا
    هو موقفنا نحن

    صامتون

    ام خائفون

    ام عاجزون

    ام ام

    والان عندما علمت خبر حجب مدونة يالانفضحهم

    اعلنها اننا معكم متضامنون

    مع عبد الرحمن

    ومع مدونة يالانفضحهم

    فكلنا

    عبد الرحمن

    ولن نصمت

    مهما حدث

    ردحذف
  3. أشكركم يا جماعة على تضامنكم واعتذر ان كنت حاد اللهجة

    ردحذف
  4. نحن المسلمون اصبحنا نخاف الحاكم ولانخاف الله
    نسينا ديننا فانسانا الله انفسنا
    نسينا اننا اصحاب الحق فطغى الظالم علينا
    لنا الله
    مصرىىىىىىىىىىىىىىىىىىىىى

    ردحذف